नेपाली कफी: अन्तर्राष्ट्रिय बजारमा उत्कृष्ट

काठमाडौँ, चैत २१ गते ।Gorkhapatraonline.com

नेपाली कफीले अन्तर्राष्ट्रिय बजारमा उत्कृष्ट स्थान पाएको छ । अन्तर्राष्ट्रिय संस्था ‘कफी रिभ्यु’ ले नेपालका एक कम्पनीको कफीको नमुना परीक्षण गरी सो स्थान दिएको हो । नुवाकोटको लेकाली कफीले उत्पादन गरेको कफीको नमुना परीक्षण गरी कफी रिभ्युले ९० अङ्क प्रदान गरेको छ । विश्वका उत्कृष्ट कफीहरूको नाम कफी रिभ्युले प्रकाशन गरेको छ । जसमा नेपाल पनि परेको छ । विश्व बजारका लागि ९० अङ्क उत्कृष्ट अङ्क रहेको लेकाली कफी उत्पादक निम तेञ्जिङ शेर्पाले जानकारी गराउनुभयो ।

कफी रिभ्युका अनुसार ६० देखि ६५ अङ्कसम्म ल्याउनेलाई ठीकठीकै मानिन्छ । ८० अङ्कभन्दा माथि अङ्क ल्याउनेलाई उत्कृष्टमा राखिने गरिएको छ । हालसम्म कफी रिभ्युको वेबसाइटमा ९६ अङ्क प्राप्त गरेको देशको कफीको नाम उल्लेख गरेको छ ।
६० अङ्कभन्दा कम अङ्क ल्याउने कफी गुणस्तर नहुने मापदण्ड राखिएको छ । नेपालका विभिन्न कफी फर्मले सन् २०१२ देखि लगातार कफी रिभ्युमा आफ्नो नमुना पठाउँदै आएका थिए । अन्तर्राष्ट्रिय बजारमा नेपाली कफीले आफ्नो सुरक्षित स्थान नबनाएको बेला यो रिभ्युले किसानलाई आशा जगाएको बताइएको छ ।
राष्ट्रिय चिया तथा कफी विकास बोर्डमा मङ्गलबार आयोजना गरिएको एक अन्तत्र्रिmया कार्यक्रममा बोर्डका बद्रीप्रसाद बाँस्कोटाले नेपाली कफी पनि उत्कृष्ट हो भन्ने कुरा निजी क्षेत्रको एक अन्तर्राष्ट्रिय संस्थाले प्रमाणित गरिसकेपछि यसको महìव बढ्ने बताउनुभयो । नेपाली कफीका लागि अब बजारको समस्या हुने छैन, उहाँले भन्नुभयो, अब अन्तर्राष्ट्रिय उपभोक्ताको पनि नेपाली कफीप्रति आकार्षण बढ्छ । अन्तर्राष्ट्रिय रूपमा नेपाली कफीले यसरी उत्कृष्ट अङ्क ल्याउनु धेरै ठूलो कुरा हो, तर यो त्यत्तिकै आएको होइन, लेकाली कफीका शेर्पाले भन्नुभयो, यसरी अङ्क ल्याउनु मुख्य कुरा गुणस्तर नै हो । गुणस्तरमा ध्यान दिएन भने उत्कृष्ट अङ्क ल्याउन सकिँदैन । भारत र चीनको उत्पादन उच्च रहेको छ । यस बीचमा नेपालले प्रतिस्पर्धा गर्नु चानचुने कुरा नरहेको उहाँको दाबी छ ।
सगरमाथाको देश र यहाँको चिया र कफी मीठो हुन्छ भनेर मात्र हुँदैन यसका लागि गुणस्तरमै ध्यान दिनुपर्ने बताउँदै उहाँले कफी टिप्ने बेलादेखि नै गुणस्तरमा ध्यान दिनुपर्ने बताउनुभयो । कफी रिभ्युका लागि कम्तीमा ४० वटा नमुना दिनुपर्छ । कफी रिभ्युमा जसले पनि आफ्नो नमुना पठाउन सकिन्छ । मापदण्ड पूरा गरेर पठाउने जुनसुकैको परीक्षण गर्ने उहाँले बताउनुभयो ।

कफी उत्पादनमा लाग्नु भएका राजकुमार बन्जाराले विश्वमा नेपाली किसानले राम्रो मूल्य पाउने मध्येका कफी रहेको तर नेपाली बजार नै राम्रो नरहेको टिप्पणी गर्नुभयो । नेपालको दुई ठूला देश चीन र भारत रहेका छन् । तिनका अगाडि हामीले प्रतिस्पर्धाको कुरा गर्न हुँदैन तर गुणस्तरका लागि प्रतिस्पर्धा गर्न सक्छौँ, उहाँले भन्नुभयो, नेपाली कफीलाई गुणात्मकले होइन, गुणस्तरमा ध्यान दिए मात्र अन्तर्राष्ट्रिय बजारमा पहिचान बनाउन सक्छ ।
चीनबाहेक २९ देशमा नेपाली कफी निर्यात भइरहेको छ । चीन पठाउनका लागि नेपाली कफी व्यवसायीले निकै प्रयास गरेको तर राज्यले ध्यान नदिएको गुनासो बन्जाराले गर्नुभयो । बजारमा देखिने प्रायः कफीमा स्पेसल कफी भनेर लेवल लगाएका हुन्छन् । जो सत्य होइन, बिक्रीका लागि त्यो लेबल लगाएको उहाँको दाबी छ ।
उहाँले भन्नुभयो, बट्टामा स्पेसल लेखिएका सबै कफी स्पेसल कफी होइनन् । अर्को कुरा नेपालका सबै कफी अर्गानिक हो भनी दाबी गरिएको छ तर सबै अर्गानिक नरहेको उहाँले दाबी गर्नुभयो । उपभोक्तालाई झुक्याउनका लागि अर्गानिक हो भनी दाबी गरिएको हुन्छ तर त्यो कफी अर्गानिक हो भनी कतैबाट ‘सर्टिफाइड’ नभएको उहाँले स्पष्ट पार्नुभयो ।

नेपालमा दुई हजार छ सयभन्दा बढी हेक्टरमा कफी खेती भइरहेको छ । गत आर्थिक वर्ष नेपालमा ४६४ मेट्रिक टन कफी उत्पादन भएको थियो ।

Leave a Reply

Your email address will not be published. Required fields are marked *